झोपाळ्यावर बसूं, सारख्या साड्या नेसूं,
फांदीच्या साळुंक्या ग सारख्या बहिणी दिसूं. १
मोहरा आला आंबा, फळा आली ग चमेली,
माझ्या राव्यासाठीं तुझीं मैना ग तान्हेली. २
शेजारीण बाई, सडा घाला अंगणांत,
रावा, मैना दोघां जेवूं घालूं दुधभात. ३
माझ्या दारावरी कोण आले दोघेजण ?
भाऊबीजे आले भाऊ रामलक्षुमण. ४
शेजारीण बाई, तुझा गुलाब कांट्यांचा,
माझ्या जुईला ग नाहीं बाई झेपायाचा ! ५
थोरल्या विहिणीबाई, नका सांगूं हो गार्हाणीं;
कोण पुसे तुम्हां नांदतां राजाराणी ? ६
श्रीमंतीण बाई, तुझा शृंगार कांट्याचा,
मानितें गरीबीचा संसार झपाट्याचा. ७
तुझ्या गळा बाई, सोन्याचं ग लोढणं,
पोतेचं गरीबीचं मंगलसूत्र माझं लेणं ८
वेल फोफावली, तिला ये ना बाई फळ;
दारीं हत्ती-घोडे, घरीं नाहीं बाई मूल ! ९
हत्ती-घोडे दारीं, चोपदाराच्या ललकारी,
नाहीं मंगलवाद्यं, तोरण नाहीं दारीं ! १०
शितं तिथं भुतं घरीं एक गजबज,
बोबडा बोल नाहीं, नाहीं कानीं कुजबूज ११
माझ्या दारावरी गलबला ग कशाचा ?
आता कीं वेणूसाठीं तंटा चालला राजांचा. १२