सताड उघडा खिडक्या-दारे, मधल्या भिंती पाडा रे,
शांतीच्या कळसावर चढवा माणुसकीचा झेंडा रे
कुणी न हिंदू, कुणी न मुस्लिम
कुणी शीख ना कुणी इसाई,
प्रेमधर्म हा धर्म आपुला
नाते अपुले भाई भाई
हृदयामधल्या देवासाठी मने मनांशी जोडा रे -
या मातीची जात कोणती
आकाशाचा धर्म कोणता ?
वर्ण कोणता या पाण्याचा
या वार्याचा पंथ कोणता ?
एकी, शांती तिथेच प्रगती, चला विषमता गाडा रे -
अफाट धरणी, अथांग सागर
आकाशाचे असीम छप्पर,
शिरी हिमालय, हृदयी गंगा
उभे चराचर हे अपुले घर
विज्ञानाचे पंख हवे की अज्ञानाचा गाडा रे -