वामन जयंती - वामनदर्शनाने बुद्धिमोचन

कर्म आणि फ़ल, सातत्ये सेवितां । बुद्धिला जडता थोर येते ॥१॥
तेणे अदितीला थोर चिंता पडे । घालिती, सांकडे वामनाला ॥२॥
पयोव्रत करी अव्यक्त निरोपे । जेणे सर्व पापे दग्ध होती ॥३॥
इंद्रियांचा रस, तेच जाणा पय, । तेणे हरि-पाय सेवितसे ॥४॥
फ़ाल्गुनांत करी पयोव्रत सती । हरि-पद-रती धरोनीयां ॥५॥
जेव्हा शंकरांनी काम हा जाळीला । त्याच समयाला व्रत करी ॥६॥
याचा अर्थ ऐसा, काम, सर्वेश्वरा । अदिती, उदारा अर्पितसे ॥७॥
तेणे सगुणाचा होय साक्षात्कार । वामन सुंदर प्रगटत ॥८॥
संस्काराने त्यासी करोनी संस्कृत । तया पाठवीत बुद्धीपाशी ॥९॥
कर्म उपासना ह्याची जी का जोड । फ़ळ तीचे गोड ऐसे आहे ॥१०॥
फ़लाभिसंधीने बुद्धि झाली जड । तीच होय नड मोक्षालागी ॥११॥
विनायक म्हणे वामनदर्शन । बुद्धिचे मोचन करिल की ॥१२॥