अतितृष्णा न कर्तव्या

मराठी वाक्संप्रदाय - वाक्यप्रचार

   फार हांव उपयोगी नाहीं. याविषयीं पुढील गोष्ट आहे: एका रानांत पारध्यानें एका मोठ्या डुकराला बाणानें मारिलें. उलट डुकरानें पारध्याला फाडलें. दोघेहि मरुन पडल्यावर तेथें एक कोल्हा आला. त्यानें हीं दोन धुडें पाहून हीं आपल्याला बराच काळ पुरलीं पाहिजेत म्हणून राखून ठेवून हळूहळू थोडेथोडें खाण्याच्या इराद्यानें प्रथम धनुष्याच्या टोंकाला बांधलेले स्नायु तो खाऊं लागला. तेव्हा स्नायुपाश तुटल्यानें धनुष्याचें टोंक ताड्‍ कन्‍ उडून त्याचें डोकें फोडून वर निघालें व शेंडीप्रमाणें दिसूं लागलें. याप्रमाणें फार हांव धरल्यानें हा कोल्हा मेला. ‘ अतितृष्णा न कर्तव्या तृष्णां नैव परित्यजेत्‍ । अतितृष्णाभिभूतस्य शिखा भवति मस्तके ॥ ’ -पंचतंत्र २.७८.