*
गणाधीश जो ईश सर्वां गुणांचा ।
मुळारंभ आरंभ तो निर्गुणाचा ।
नमुं शारदा मूळ चत्वार वाचा ।
गमूं पंथ आनंत या राघवाचा ॥
*
मना सज्जना भक्तिपंथेचि जावें ।
तरी श्रीहरी पाविजेतो स्वभावें ।
जनी निंद्य ते सर्व सोडूनि द्यावें ।
जनी वंद्य ते सर्व भावे करावें ॥
*
प्रभाते मनीं राम चिंतीत जावा ।
पुढे वैखरी राम आधी वदावा ।
सदाचार हा थोर सांडू नये तो ।
जनी तोचि तो मानवी धन्य होतो ॥
*
सदा सर्वदा योग तुझा घडावा ।
तुझे कारणीं देह माझा पडावा ।
उपेक्षू नको गुणवंता अनंता ।
रघुनायका मागणे हेचि आता ॥
*