संत जनाबाई - दूत विनविती कर जोडुनी । म...

दूत विनविती कर जोडुनी । म्हणती आरुढावें विमानीं ॥१॥

ऋषि म्हणे न घडे ऐसें । ह्याची तृप्ति नाहीं आस ॥२॥

पटावरोनी काढिला । पटीं बैसवीन ह्याला ॥३॥

थोर वाजत गाजत । विप्र मंत्रघोष करीत ॥४॥

विजयी झाला हरिश्चंद्र । आडवा पावला परिवार ॥५॥

लक्षानुलक्ष आरत्या करिती । नगरनारी वोवाळिती ॥६॥

ऋषि अभिषेकिती रायाला । थोर मनीं आनंदाला ॥७॥

राया प्राप्‍ती जाला पट । गुडी उभवी वसिष्‍ठ ॥८॥

येथुनी हरिश्चंद्र आख्यान । नामयाची जनी म्हण ॥९॥