संस्कृत सूची|संस्कृत साहित्य|संहिता|गर्ग संहिता|माधुर्यखण्डः| अध्यायः १४ माधुर्यखण्डः अध्यायः ०१ अध्यायः ०२ अध्यायः ०३ अध्यायः ०४ अध्यायः ०५ अध्यायः ०६ अध्यायः ०७ अध्यायः ०८ अध्यायः ०९ अध्यायः १० अध्यायः ११ अध्यायः १२ अध्यायः १३ अध्यायः १४ अध्यायः १५ अध्यायः १६ अध्यायः १७ अध्यायः १८ अध्यायः १९ अध्यायः २० अध्यायः २१ अध्यायः २२ अध्यायः २३ अध्यायः २४ माधुर्यखण्डः - अध्यायः १४ गर्ग संहिता ही गर्ग मुनिंची रचना आहे. ह्या संहितेत श्रीकृष्ण आणि राधाच्या माधुर्य-भाव असलेल्या लीलांचे वर्णन आहे. Tags : gargagarga samhitasamhitaगर्गगर्ग संहितासंहिता जालन्धरी-सखीगणोपाख्यानम् Translation - भाषांतर श्रीनारद उवाच -जालंधरीणां गोपीनां जन्मानि शृणु मैथिल ।कर्माणि च महाराज पापघ्नानि नृणां सदा ॥१॥रजन् सप्तनदीतीरे रंगपत्तनमुत्तमम् ।सर्वसंपद्युतं दीर्घं योजनद्वयवर्तुलम् ॥२॥रंगोजिस्तत्र गोपालः पुराधीशो महाबलः ।पुत्रपौत्रसमायुक्तो धनधान्यसमृद्धिमान् ॥३॥हस्तिनापुरनाथाय धृतराष्ट्राय भूभृते ।हैमानामर्बुदशतं वार्षिकं स ददौ सदा ॥४॥एकदा तत्र वर्षांते व्यतीते किल मैथिल ।वार्षिकं तु करं राज्ञे न ददौ स मदोत्कटः ॥५॥मिलनार्थं न चायते रंगोजौ गोपनायके ।वीरा दश सहस्राणि धृतराष्ट्रप्रणोदिताः ॥६॥बद्ध्वा तं दामभिर्गोपमाजग्मुस्ते गजह्वयम् ।कति वर्षाणि रंगोजिः कारागारे स्थितोऽभवत् ॥७॥सन्निरुद्धस्ताडितोऽपि लोभी भीरुर्न चाभवत् ।न ददौ स धनं किंचिद्धृतराष्ट्राय भूभृते ॥८॥कारागारान्महाभीमात्कदाचित्स पलायितः ।रात्रौ रंगपुरं प्रागाद् रंगोजिर्गोपनायकः ॥९॥पुनस्तं हि समाहर्तुं धृतराष्ट्रप्रणोदितम् ।अक्षौहिणीत्रयं राजन् समर्थबलवाहनम् ॥१०॥तेन सार्द्धं स बाणौघैस्तीक्ष्णधारैः स्फुरत्प्रभैः ।युयुधे दंशितो युद्धे धनुष्टंकारयन्मुहुः ॥११॥शत्रुभिश्छिन्नकवचः छिन्नधन्वा हतस्वकः ।पुरमेत्य मृधं चक्रे रंगोजिः कतिभिर्दिनैः ॥१२॥अनाथः शरणं चेच्छन् कंसाय यदूभूभृते ।दूतं स्वं प्रेषयामास रंगोजिर्भयपीडितः ॥१३॥दूतस्तु मथुरामेत्य सभां गत्वा नताननः ।कृताञ्जलिश्चौग्रसेनिं नत्वा प्राह गिराऽऽर्द्रया ॥१४॥रंगोजिनामा नृप रंगपत्तनेगोपोऽस्ति नीतिज्ञवरः पुराधिपः ।स्वशत्रुसंरुद्धपुरो महाधिभृद्अलब्धनाथः शरणं गतस्तव ॥१५॥त्वं दीनदुःखार्तिहरो महीतलेभौमदिसंगीतगुणो महाबलः ।सुरासुरानुद्भटभूमिपालकान्विजित्य युद्धे सुरराडिव स्थितः ॥१६॥चन्द्रं चकोरश्च रविं कुशेशयोयथा शरच्छीकरमेव चातकः ।क्षुधातुरोऽन्नं च जलं तृषातुरःस्मरत्यसौ शत्रुभये तथा त्वाम् ॥१७॥इत्थं श्रुत्वा वचस्तस्य कंसो वै दीनवत्सलः ।दैत्यकोटिसमायुक्तो मनो गंतुं समादधे ॥१८॥गोमूत्रचयसिन्दूरकस्तूरीपत्रभृन्मुखम् ।विन्ध्याद्रिसदृशं श्यामं मदनिर्झरसंयुतम् ॥१९॥पादे च शृङ्खलाजालं नदंतं घनवद्भृशम् ।द्विपं कुवलयापीडं समारुह्य मदोत्कटः ॥२०॥चाणूरमुष्टिकाद्यैश्च केशिव्योमवृषासुरैः ।सहसा दंशितः कंसः प्रययौ रंगपत्तनम् ॥२१॥यदूनां च कुरूणां च बलयोस्तु परस्परम् ।बाणैः खड्गैः त्रिशूलैश्च घोरं युद्धं बभूव ह ॥२२॥बाणांधकारे संजाते कंसो नीत्वा महागदाम् ।विवेश कुरुसेनासु वने वैश्वानरो यथा ॥२३॥कांश्चिद्वीरान् सकवचान् गदया वज्रकल्पया ।पातयामास भूपृष्ठे वज्रेणेंद्रो यथा गिरिम् ॥२४॥रथान्ममर्द पादाभ्यां पार्ष्णिघातेन घोटकान् ।गजे गजं ताडयित्वा गजान्प्रोन्नीय चांघ्रिषु ॥२५॥स्कन्धयोः कक्षयोर्धृत्वा सनीडान् रत्नकंबलान् ।कांश्चिद्बलाद्भ्रामयित्वा चिक्षेप गगने बली ॥२६॥गजाञ्छुण्डासु चोन्नीय लोलघंटासमावृतान् ।चिक्षेप संमुखे राजन् मृधे व्योमासुरो बली ॥२७॥रथान् गृहीत्वा साश्वांश्च शृङ्गाभं भ्रामयन्मुहुः ।चिक्षेप दिक्षु बलवान् दैत्यो दुष्टो वृषासुरः ॥२८॥बलात्पश्चिमपादाभ्यां वीरानश्वानितस्ततः ।पातयामास राजेंद्र केशी दैत्याधिपो बली ॥२९॥एवं भयंकरं युद्धं दृष्ट्वा वै कुरुसैनिकाः ।शेषा भयातुरा वीरा जग्मुस्तेऽपि दिशो दश ॥३०॥रंगोजिं सकुटुम्बं तं नीत्वा कंसोऽथ दैत्यराट् ।मथुरां प्रययौ वीरो नादयन् दुंदुभीञ्छनैः ॥३१॥श्रुत्वा पराजयं स्वस्य कौरवाः क्रोधमूर्छिताः ।दैत्यानां समयं दृष्ट्वा सर्वे वै मौनमास्थिताः ॥३२॥पुरं बर्हिषदं नाम व्रजसीम्नि मनोहरम् ।रंगोजये ददौ कंसो दैत्यानामधिपो बली ॥३३॥वासं चकार तत्रैव रंगोजिर्गोपनायकः ।बभूवुस्तस्य भार्यासु जालंधर्यो हरेर्वरात् ॥३४॥परिणीता गोपजनै रूपयौवनभूषिताः ।जारधर्मेण सुस्नेहं श्रीकृष्णे ताः प्रचक्रिरे ॥३५॥चैत्रमासे महारासे ताभिः साकं हरिः स्वयम् ।पुण्ये वृन्दावने रम्ये रेमे वृन्दावनेश्वरः ॥३६॥इति श्रीगर्गसंहितायां माधुर्यखण्डे श्रीनारदबहुलाश्वसंवादेजालंधर्युपाख्यानं नाम चतुर्दशोऽध्यायः ॥१४॥हरिः ॐ तत्सच्छ्रीकृष्णार्पणमस्तु ॥ N/A References : N/A Last Updated : May 19, 2021 Comments | अभिप्राय Comments written here will be public after appropriate moderation. Like us on Facebook to send us a private message. TOP