संतचरित्रे - जनजसवंत

जनजसवंत भला । देवत याचे घरा गेला ॥१॥
येऊन राहातो चाकरी । पोटा मागतो भाकरी ॥२॥
स्त्री वाढावया गेली । वरचेवर विठठल झेली ॥३॥
काम सांगा सहज कांहीं । करितों मी लवलाहीं ॥४॥
मागें उरों नेदी कांहीं । कशाला गे माणुस बाई ॥५॥
दुबळ्याचे घरची नागवण । भाग्या घरची सांठवण ॥६॥
शेतांतील काम करी । विठो माझा नांगर धरी ॥७॥
खुटें पालख्या तोडी । साठ चाहुर पाणा झोडी ॥८॥
देव लाकडांसी गेला । परत घेवूनियां आला ॥९॥
पांचा साता गांवा गेला । लेंकी सुना घेऊन आला ॥१०॥
खांद्यावरी आणिल्या पाहीं । नवल याचें सांगों काइ ॥११॥
मायलेंकी केल्या भेटी । ऐशा विठोबाच्या गोष्टी ॥१२॥
कैसा प्रगटरे झाला । विठो माझा निघोन गेला ॥१३॥
आठवा आठवा माझा सखा । नामा सांगे सर्व लोकां ॥१४॥