महालक्ष्म्या आर्तिक्यम् ।
अलिकुलकोमलबाले धृतमौक्तिमाले, स्तनयुगनिर्जितताले क्षीरांबुधिबाले ॥
काश्मीरांकितभाले नाशितभवजाले, लीलामर्दितकोले शरणागतपाले ॥१॥
जय देवि जय देवि जय मातः कमले, द्रुतजांबूनदविमले सुरनुतपदकमले ॥ ध्रु० ॥
कमलदलायतनयने शशिनीभशुभवदने, सिंहविराजितगमने हीरावलिरदने ॥
मुनिजनविरचितनमने कृतराक्षसकदने, कोकिलमंजुलगदने विष्णूरःसदने ॥ जय० ॥२॥
नागाद्यंकितमस्तकभुवनावनसक्ते, प्राशनभाजनखेटाद्यायुधकरयुक्ते ॥
कृतकरवीरनिवासे रिपुमर्दनसक्ते, शुकनासासमनासे तारितनिभजक्ते ॥ जय० ॥३॥
अधरविनिर्जितबिंबे विश्वस्तुतरुपे, पृथुतरचारुनितंबे कृतदानवकोपे ॥
भ्रूजितमन्मथचापे निजजनहततापे, दाजीज्योतिर्विद्वान् प्रणमति हततापे ॥ जय० ॥४॥