अथातः संप्रवक्ष्यामि चक्रं त्रैलोक्यदीपकम् । विख्यातं सर्वतोभद्रं सद्यः प्रत्ययकारकम् ॥१॥
एकवेधे भवेद्युद्धं युग्मवेधे धनक्षयः । त्रिवेधेन भवेद्भङ्गो मृत्युश्चैव चतुर्ग्रहैः ॥२॥
एकादिक्रूरवेधेन फलं पुंसां प्रजायते । उद्वेगश्च तथा हानी रोगो मृत्युः क्रमेण च ॥३॥
भ्रमो ऋक्षेऽक्षरे हानिः स्वरे व्याधिर्भयं तिथौ । राशिवेधे महाविघ्नं पञ्चवेधे न जीवति ॥४॥
अर्कवेधे मनस्तापो द्रव्यहानिस्तु भूसुते । रोगपीडाकरः सौरी राहुः केतुश्च विघ्नदौ ॥५॥
चन्द्रो मिश्रफलं पुंसां रिपुश्चैव तु भार्गवे । बुधवेधे भवेत्प्रज्ञा जीवः सर्वफलप्रदः ॥६॥