लग्नगते नवमपतौ देवान् गुरुन्मन्यते महाशूरः ।
कृपणः क्षितिपतिकर्मा स्वल्पग्रासी भवति मतिमान् ॥१॥
नवमपे धनगते वृषलो विदितः सुशीलवान् सत्यः ।
सुकृती वदनव्यङ्गश्चतुष्पदोत्पन्नपीडितः ॥२॥
सहजगते सुकृतपतौ रुपस्त्री बन्धुवत्सलः पुरुषः ।
बन्धुस्त्रीरक्षणकृद्यदि जीवति बन्धुभिः सदा सहितः ॥३॥
सुकृतेशे हिबुकस्थे पितृभक्तः पितृयात्रादिके विदितः ।
विदितः सुकृती पुरुषः पितृकर्मणि रतमतिर्भवति ॥४॥
सुकृतगृहपे सुतस्थे सुकृती देवगुरुपूजने निरतः ।
वपुषा सुन्दरमूर्तिः सुकृतसमेताः सुताः बहवः ॥५॥
शत्रुप्रणतिपरायणधर्माकलितं कलाविकलकायम् ।
दर्शननिन्दानिरतं सुकृतपतिः षष्ठगः कुरुते ॥६॥
नवमपतौ सप्तमगे सत्यवती सुवदना सुरुपा च ।
शीलश्रीयुतदयिता सुकृतयुता जायते नियतम् ॥७॥
दुष्टो जन्तुविघाती गृहबन्धुविवर्जितः सुकृतरहितः ।
नवमेशे निधनगते क्रूरे षण्ढः स विज्ञेयः ॥८॥
सुकृतगतः सुकृतपतिः स्वबन्धुभिः प्रीतिमतुलितसमत्वम् ।
दातारं देवगुरोः स्वजनकलत्रादिषु सक्तम् ॥९॥
नृपकर्माणं शूरं मातापित्रोश्च पूजनं पुरुषम् ।
धर्मख्यातं कुरुते सुकृतपतिर्गगनगृहशीलः ॥१०॥
दीर्घायुर्धर्मपरो धनेश्चरः स्नेहलो नृपतिलाभी ।
सुकृतख्याती सुसुतः सुकृतविभौ लाभभवनस्थे ॥११॥
द्वादशगे सुकृतेशे मानी देशान्तरे सुरुपश्च ।
विद्यावाञ्छुभखेटे क्रूरे च भवेदतिधूर्तः ॥१२॥