चन्द्राच्च प्रथमे सौरिर्जन्मकाले यदा भवेत् ।
प्राणनाशोऽर्थनाशश्च बन्धुनाशस्तथापरे ॥१॥
चन्द्राद्वितीयगो मन्दो जन्मकाले यदा भवेत् ।
मातुश्च कष्टकारी च अजाक्षीरेण जीवति ॥२॥
चन्द्रात्सहजगः सौरिर्जन्मकाले यदा भवेत् ।
बहुकन्या भवेत्पुंस उत्पद्य म्रियते ध्रुवम् ॥३॥
चन्द्राच्चतुर्थगो नूनं शनिर्जन्मनि संभवेत् ।
महापौरुषकारी च शत्रुहन्ता न संशयः ॥४॥
चन्द्रात्पञ्चमगः सौरिर्जन्मकाले यदा भवेत् ।
स्त्री स्याच्छयामलवर्णा च ह्यथवा प्रियवादिनी ॥५॥
रविजः षष्ठगश्चन्द्राज्जन्मकाले यदा भवेत् ।
महाक्लेशी च कष्टी च आयुर्हीनो भवेन्नरः ॥६॥
चन्द्राच्च सप्तमे स्थाने यदा च रविनन्दनः ।
महाधर्मी च दाता च स्त्रीणां बहुकरग्रहः ॥७॥
रविजो ह्यष्टमे स्थाने चन्द्रतो जन्मसंभवः ।
पितुश्च कष्टकारी च बहुदाने शुभं भवेत् ॥८॥
चन्द्रान्नवमगः सौरिर्जन्मकाले यदा भवेत् ।
यदा मुग्धदशाप्राप्तिर्धनहानिर्भविष्यति ॥९॥
चन्द्राद्दशमगः सौरिर्जन्मकाले यदा भवेत् ।
नृपतुल्यो भवेद्देहो कृपणो धनपूरितः ॥१०॥
चन्द्रादेकादशे सौरिर्जन्मकाले यदा भवेत् ।
देहक्लेशी महाकष्टी ह्यधर्मी च न संशयः ॥११॥
द्वादशे भवने सौरिश्चन्द्राच्च पतते यदि ।
निर्धनी भिक्षुकश्चैव धर्मेणैव विवर्जितः ॥१२॥