बवाख्ये करणे जातो मानी धर्मरतः सदा ।
शुभमङ्गलकर्मा च स्थिरकर्मा च जायते ॥१॥
बालवाख्ये नरो जातस्तीर्थदेवादिसेवकः ।
विद्यार्थसौख्यसंपन्नो राजमान्यश्च जायते ॥२॥
कौलवाख्ये तु जातस्य प्रीतिः सर्वजनैः सह ।
सङ्गतिर्मित्रवर्गैश्च मानवांश्च प्रजायते ॥३॥
तैतिले करणे जातः सौभाग्यधनसंयुतः ।
स्नेही सर्वजनैः सार्द्ध विचित्राणि गृहाणि च ॥४॥
गराख्ये कृषिकर्मा च गृहकार्यपरायणः ।
यद्वस्तु वाञ्छितं तच्च लभ्यते च महोद्यमैः ॥५॥
वाणिज्ये करणे जातो वाणिज्येनैव जीवति ।
वाञ्छितं लभते लोके देशान्तरगमागमैः ॥६॥
अशुभारम्भशीलश्च परदाररतः सदा ।
कुशलो विषकार्येषु विष्टयाखकरणेन च ॥७॥
शकुनौ करणे जातः पौष्टिकादिक्रियाकृतिः ।
औषधादिषु दक्षश्च भिषग्वृत्तिश्च जायते ॥८॥
करणे च चतुष्पादे देवद्विजरतः सदा ।
गोकर्मा गोप्रभुलोंके चतुष्पदचिकित्सकः ॥९॥
नागे च करणे जातो धीवरप्रीतिकारकः ।
कुरुते दारुणं कर्म दुर्भगो लोललोचनः ॥१०॥
किंस्तुघ्नकरणे जातः शुभकर्मरतो नरः ।
तुष्टिं पुष्टिं च माङ्गल्यं सिद्धिं च लभते सदा ॥११॥