युगानयनम् ।
युगं भवेद्वत्सरपञ्चकेन युगानि च द्वादश १२ वर्षषष्टयाम् ॥
युगफलम् ।
मद्यमांसप्रियो नित्यं परदाररतः सदा ।
कविः शिल्परतः प्राज्ञो जायते प्रथमे युगे ॥१॥
वाणिज्ये व्यवहारी च धर्मिष्ठः सत्यसङ्गतः ।
द्रव्यलोभ्यतिपापात्मा युगे जातो द्वितीयके ॥२॥
भोक्ता दाता कृतप्रज्ञो ब्राह्मणो देवपूजकः ।
तेजस्वी धनयुक्तश्च तृतीये फलमश्नुते ॥३॥
वाटिकाक्षेत्रलोभी स्यादोषधीप्रियमानवः ।
धातुवादे धननाशो जायते च चतुर्युगे ॥४॥
पुत्रोत्पत्तिः सदा प्रोक्तो धनवांश्च जितेन्द्रियः ।
पितृमातृप्रियश्चैव जायते पञ्चमे युगे ॥५॥
सर्वदा नीचशत्रुश्च सर्वदा महिषीप्रियः ।
पट्टघातो भयार्त्तश्च युगे षष्ठे च जायते ॥६॥
बहुमित्रप्रियश्चैव व्यापारे कुटिला गतिः ।
शीघ्रगामी तथा कामी जायते सप्तमे युगे ॥७॥
पापकर्त्ता च सन्तुष्टो व्याधिदुःखान्वितस्तथा ।
कर्त्ता च परहिंसाया जायते त्वष्टमे युगे ॥८॥
वापीकूपतडागादिदेवदीक्षातिथिप्रियः ।
भूपतिर्वृत्रहातुल्यो जायते नवमे युगे ॥९॥
राजाधिराजमंत्री च स्थानप्राप्तिमहासुखः ।
सुवेषरुपो दाता च जायते दशमे युगे ॥१०॥
बुद्धिमांश्च सुशीलश्च स्थापकश्चासुरद्विषाम् ।
संग्रामे च भवेच्छूरो जात एकादशे युगे ॥११॥
तेजस्वी च प्रसन्नात्मा नरमध्ये महाजनः ।
कृषिवाणिज्यकर्त्ता च जायते द्वादशे युगे ॥१२॥