देवा मजला दाखवा । हो देवा मजला दाखवा ।
त्या तुमच्या हो सुंदर रुपा । देवा मजला दाखवा ॥धृ०॥
चरण मृदु ते नवनीताहुनी । झुळझुळ गंगा वाहे त्यांतुनी ।
ऐसे चरण पाहीन नयनी । सांगा केधवा । हो देवा मजला दाखवा ॥१॥
चरण महिमा वर्णूं मी किती । पतीत पावन स्मरतां होती ।
ऐसी त्रैलोकीं ती ख्याती । असें माधवा । हो देवा० ॥२॥
निशिदिनीं चरण हृदयीं ध्यातां । मुक्त संसारीं करी निजभक्ता ।
नाही जन्म मरण वार्ता । पुनरपी ह्या जीवा । हो देवा० ॥३॥
चरणकमलीं भ्रमरी होवुनी । मोद प्रमोद सेविन प्रेमानी ।
वारीचा दृढ निश्चय जाणुनी । आंस ही पुरवा । हो देवा० ॥४॥