आहो जोडला मोक्षदाता ॥ भुक्ति मुक्ती यासी मागो ॥
आहो तारील हा जन्मोजन्मीं ॥ चरणीं (पायीं) याचे रे राहो ॥
आहो उद्धरीले अनंत कोटी ॥ आह्मा तरी जगजेठी ॥
माझ्या चिंतोबाचा धर्म जागो ॥धृ०॥१॥
आहो चिंचवडीं रहिवास ॥ नाम मोरया देव ॥
आहो पुरवी तो मनकामना ॥ ह्मणूनि चिंतामणी नाम ॥
आहो चिंता माझी हरीं देवा ॥ चुकवी जन्म यातना ॥माझ्या० ॥२॥
आहो अज्ञान बाळ तुझें देवा ॥ आलो तुझिया ठायां ॥
आहो कृपा करी देवराया ॥ लावी आपुल्या पायां ॥
आहो न साडी बा चरण तूझे ॥ आणिका ठायासीं नव जाये ॥माझ्या० ॥३॥
अहो बुद्धिहीन पांगूळ मी ॥ आलों तुझिया ठायां ॥
अहो नुपेक्षीं तूं देवराया ॥ देंई भक्ती सोहळा ॥
अहो मन माझें गुंतलेंसें ॥ कोठें नव जाय देवराया ॥माझ्या चिंतो० ॥४॥
अहो मजवरीं कृपा करीं ॥ सेवा आपूली घेंई ॥
अहो चिंतामणी गोसाव्यांनीं ॥ कृपा (दया) मजवर केली ॥
अहो कृपे (दये ) स्तव जोडी झाली ॥ गेल्या पापाच्या राशी ॥माझ्या चिंतो० ॥५॥
अहो आणिक एक विनंती ऐक ॥ भक्ता तारीं तूं सनाथ ॥
अहो कृपा (दया) मज बहुत करी ॥ विनवी नारायण दीन ॥
अहो चरणा पासून न करीं दुरी ॥ चरण (पाय) धरिले दृढ भारी ॥
माझ्या चिंतोबाचा धर्म जागो ॥ याचे चरणीं लक्ष लागो ॥६॥
याची सेवा मज घडो ॥ याचें ध्यान हृदयीं राहो ॥
माझ्या चिंतोबाचा धर्म जागो ॥७॥