स्मरसमरोचितविरचितवेशा । गलितकुसुमदरविलुलितकेशा ॥कापि मधुरिपुणा विलसति युवतिरधिकगुणा ॥१॥
हरिपरिरम्भणवलितविकारा । कुचकलशोपरि तरलितहारा ॥२॥
विचलदलकललिताननचन्द्रा । तदधरपानरभसकृततन्त्रा ॥३॥
चञ्चलकुण्डलदलितकपोला । मुखरितरसनजघनगलितलोला ॥४॥
दयितविलोकितलज्जितहसिता । बहुविधकूजितरतिरसरसिता ॥५॥
विपुलपुलकपृथुवेपथुभङ्गा । श्वसितनिमीलितविकसदनङ्गा ॥६॥
श्रमजलकणभरसुभगशरीरा । परिपतितोरसि रतिरणधीरा ॥७॥
श्रीजयदेवभणितहरिरमितम् । कलिकलुषं जनयतु परिशमितम् ॥८॥
विरहपाण्डुमुरारिमुखाम्बुज- द्युतिरियं तिरयन्नपि चेतनाम् । विधुरतीव तनोति मनोभुवः सहृदये हृदये मदनव्यथाम् ॥४४॥