अरे मन, तू कछु सोच-बिचार ।
झूठो जग साँचो करि मान्यो, भूल्यो फिरत गँवार ॥
मृग जिमि भूल्यो देखि असत जल, मरु धरनी बिस्तार ।
सून्याकास तिरवरा दीखत, मिथ्या नेत्र विकार ॥
रसरी देखि सरप जिमि मान्यो, भयबस रह्यो पुकार ।
सीप माहिं ज्यों भयो रौप्य-भ्रम, तिमि मिथ्या संसार ॥
स्वपन- दृश्य साँचे करि मानत, नहिं कछु तिन महँ सार ।
तिमि यह जगि मिथ्या ही भासत, प्रकृति-जनित खिलवार ॥
जो यातें उद्धार चहै तो, हरिमय जगत निहार ।
मायापतिकी सरन गहे तै होवे तव निस्तार ॥