चल, मना अम्हि जाऊ या ॥
श्रीगुरुदर्शन घेऊ या ॥
अनन्य भावे शरण रिघूनी तन-मन-धन हे अर्पू या ॥धृ०॥
काम क्रोध घालवु या ॥
मदमत्सरा हालवू या ॥
वरिवरि उठती विकल्प ह्रदयी त्यांना त्वरितचि मालवून ॥चल०॥१॥
दशइंद्रिये झिजवू या ॥
जन्ममरण अह्मि बुजवू या ॥
भवपाशातुनि मुक्त होउनी अलिप्त जगि अम्हि राहू या ॥चल०॥२॥
वासनेला खणू या ॥
कामनेला हणू या ॥
दुर्बुद्धीला त्वरित दवडुनी भक्ती संगे घेऊ या ॥चल०॥३॥
मायेला अम्हि चिरू या ॥
दयेला अम्हि वरू या ॥
मन्मथासि त्या त्वरित दवडुनी भावा संगे घेऊ या ॥चल०॥४॥
शांती मैत्रिण करू या ॥
स्वानंदाने भरू या ॥
मीतुपणाचा गर्व हरूनी स्वेच्छे जगि अम्हि विवरू या ॥चल०॥५॥
अज्ञानाला जाळू या ॥
ज्ञानासंगे खेळू या ॥
काया वाचा मना अर्पुनी सद्गुरुचरणी लोळू या ॥चल०॥६॥
जागृतीत अम्हि राहू या ॥
स्वप्न सुषुप्ती पाहू या ॥
तुरिया लंघुनि म्हणते कृष्णा मोक्षपदासी जाऊ या ॥चाल०॥७॥