TransLiteral Foundation
Don't follow traditions blindly or don't assume a superstition either.
Don't be intentionally ignorant. Ask us!! Make Informed Religious Decisions!!
मराठी मुख्य सूची|मराठी साहित्य|भजन|मानसगीत सरोवर|
रघुनाथांनी कीर्ति मिळविली...

मानसगीत सरोवर - रघुनाथांनी कीर्ति मिळविली...

भगवंताच्या लीला, त्याचे स्वरूप, अवतारकृत्ये व प्रत्येक अवतारातील अनेकविध प्रसंग, यावर आधारीत भजनांचा संग्रह, म्हणजेच मानसगीत सरोवर.


श्री विष्णूचे गाणे

रघुनाथांनी कीर्ति मिळविली जन्मुनि भूलोकी ॥

श्रीविष्णूचे मंदिर स्थापुनि गेले सुर-लोकी ॥धृ०॥

पटवर्धन निळकंठा उदरी आले रघुनाथ ॥

सत्कीर्तीचा उभवुनिया ध्वज गेले स्वर्गात ॥

नाही त्यांच्या ऐसा दुसरा त्या सरदारात ॥

दानशूर ते वीर असोनी साधिति परमार्थ ॥

कुरुंद्वाडच्या बैसुनि गादीवरि राज्या करित ॥

होते त्यांनी स्थापन केले श्रीलक्ष्मीकांत ॥

स्नान करिता बघुनि मी झाले अंतरि अति चकित ॥

कृष्णेवरति घाट बांधिला सोपानासहित ॥चाल॥

गजाननाचे मंदिर अति छोटे ॥

सुब्रह्मण्णीचे वरती मोठे ॥

पाहुनि मजला विस्मय मनि वाटे ॥

बघुनी ओर्‍या धर्मशाळेची जागा अवलोकी ॥

बघत बघत मी सिमा ओलांडुनि गजानना देखी ॥ रघुनाथा०॥१॥

प्रथमारंभी करुन प्रदक्षिणा नमुनी गणपतिते ॥

घालुनि उजवे अश्वत्था-प्रति स्तवि मग विठ्ठलते ॥

पाहुन पशुपति जाय पाहण्या श्रीहरिमंदिर ते ॥

मार्गी येता दिसले मजला स्थानहि मोहक ते ॥

बहुकुसुमान्वित वृक्ष पाहिले गरुडाजवळी ते ॥

मांदारादिक भेदुन गगनाप्रति गेले तरु ते ॥

शमिदूर्वांची दाटी झाली तुळशी बन जेथे ॥

केळि नारळी बकुळ पोफळी जाइजुई तेथे ॥

चुनेगच्चिचे हौद बांधिले दोबाजू सम ते ॥

नाहि न्यूनता फुल-पत्रीची पुजनासी तेथे ॥

विस्मय वाटे ममचित्तासी कोठुन जळ येते ॥

दोमोटांनी वृषभ पाजिती या तरुंना नित ते ॥चाल॥

उत्तर पश्चिम पूर्वेचे द्वारि ॥

येति दर्शना प्रभुच्या नरनारी ॥

घालुनि उजवे जाती माघारी ॥

परि मम-मानस तृप्त न झाले पाहुन क्षणभर की ॥

द्वाररक्षका न मानुनी मी चढले झणि वर की ॥रघुनाथा०॥२॥

सिताबाइकृत पाहुन मंडप दूमजल्यावरती ॥

चढुन विलोकी शिखरी शोभा केली सुंदर ती ॥

कुशलपणाची कमाल झाली मुनिसुरवर मूर्ती ॥

काढुन प्रतिमा तर्‍हेतर्‍हेच्या हेम-कळस वरती ॥

छते कोंदणे झालरि दिधल्या हंड्या झुंब्रे ती ॥

कार्तिक मासी दिपवाळीदिनि दीपोत्सव करिती ॥

शक अठराशे दो साली मग प्रासादपूर्ती ॥

सिताबाइनी करुनि आपुली वाढविली कीर्ति ॥चाल॥

शक सत्राशे सत्रा साली हरी अर्चिती राक्षसनामी संवत्सरी ॥

ज्येष्ठमास सित दशमी तिथि ती बरी ॥

पाहुनि सुवेळ विप्र प्रमोदे म्हणती मंत्र मुखी ॥

श्रीकांतांना स्थापुनि केले याचक बहुत सुखी ॥रघु०॥३॥

शंख चक्र आणि गदा पद्म ते चतुर्भुजाधारी ॥

किरिट कुंडले कौस्तुभ मणि वनमाला नाभिवरी ॥

शोभे कंबरि रत्‍नमेखला झगझगते भारी ॥

पायि पैंजण लाल पितांबर नेसुन जरतारी ॥

करि कडि तोडे रत्नमुद्रिका झळकति बहुतपरी ॥

गोफ पदक नवरत्न चमकती कंठामाझारी ॥

कधि मंदिल कधि फेटा बांधिति प्रभुला पूजारी ॥

शिरपेच कलगी तुरा खोविती मौक्तिक मणि भारी ॥चाल॥

अंगी सुवासिक चंदन उटि केशरी ॥

दिसती नयना लाल ओष्ठ कितितरी ॥

भासे जणु मज भक्षिसि तांबुल हरी ॥

शेज मंदिरी किनखापाद्या गाद्या पर्यंकी ॥

हंतरिळासे मऊ बिछाना कुसुमहार तबकी ॥रघुना०॥४॥

सिंधुसुता श्रीविष्णुसन्निध तिष्ठत वामांगी ॥

नेसे गुलाबी पैठणि भरजरि कंचुकी अंगी ॥

चंद्रकोरसम लावुन कुंकू भरि शेंदुर भांगी ॥

केशरकस्तुरिचंदनमिश्रित उटि चर्चुन अंगी ॥

नथबुगड्या नी भोकरबाळ्या घालुन धवलांगी ॥

गोठ पाटल्या छंद बांगड्या कर अलक्तरंगी ॥चाल॥

पायि पैंजणे दश अंगुलि अंगठ्या ॥

मंगळसूत्रे साज सरी पेट्या ॥

तन्मणि लफ्फा चंद्रहार कंठा ॥

कंबरपट्टा अवळुन दंडी बाजुबंद वाकी ॥

शालुबुट्याचा पांघरुनी श्री तनु आपली झाकी ॥रघुना०॥५॥

लक्ष्मिरमणा हे जगदीशा, भालचंद्रनृपती ॥

रघुनाथांच्या हे वंशातिल कुरुंद्वाडभुपती ॥

नांदत असता महिषीसह ते अंतरि अति झुरती ॥

रात्रंदिन ते संततिवाचुन चित्ती तळमळती ॥

ताटि रुप्याच्या नैवेद्या तुज कोण देइ पुढती ॥

वाढदिवस तव कोण करिल ही वाटे त्या खंती ॥चाल॥

दे मंत्र्यांसह सद्गुण सुत त्यांना ॥

गरुडासन्निध उभि राहुन कृष्णा ॥

प्रार्थितसे तुज येऊ दे करुणा ॥

शक अठराशे चौतिस साली केले कवन मुखी ॥

कृपा-कटाक्षे दीनदयाघन क्षमा करी चुकी ॥रघुना०॥६॥

Translation - भाषांतर
N/A

References : N/A
Last Updated : 2007-12-30T22:23:30.4330000

Comments | अभिप्राय

Comments written here will be public after appropriate moderation.
Like us on Facebook to send us a private message.

live circuit

  • सचेतन परिपथ 
RANDOM WORD

Did you know?

कोणता शब्द योग्य आहे ? नखाला जिव्हारी लागणे की जिव्हाळी लागणे?
Category : Dictionary
RANDOM QUESTION
Don't follow traditions blindly or ignore them. Don't assume a superstition either. Don't be intentionally ignorant. Ask us!!
Hindu customs are all about Symbolism. Let us tell you the thought behind those traditions.
Make Informed Religious decisions.

Featured site

Status

  • Meanings in Dictionary: 644,289
  • Dictionaries: 44
  • Hindi Pages: 4,328
  • Total Pages: 38,982
  • Words in Dictionary: 302,181
  • Tags: 2,508
  • English Pages: 234
  • Marathi Pages: 22,630
  • Sanskrit Pages: 11,789
  • Other Pages: 1

Suggest a word!

Suggest new words or meaning to our dictionary!!

Our Mobile Site

Try our new mobile site!! Perfect for your on the go needs.