एकुलता एक नका म्हणू पांडवाला
कारल्याचा येल सारा मांडव झाकला ।
पाऊस पाण्याची झळ लागली वार्‍याची
माय माऊलीची माझी पासोडी निवार्‍याची ।
तांबडया लुगडयाला डाग पडला काजळाचा
नातू कडेला जावळाचा ।
तरवड फुलला सोन्यापरास सवाई
लेकाची सर काय करील जांबाई ।
जोडवी झिनकार तुझ्या बिरुदीवर मोर
सावळी मैना माझी लेक खेळती तालीवार ।
दीरभावजयाचं राज्य जशी काटयांची पांजणी
चुडयाचं माज्या राज्य जहागिरी लाखाची साजणी ।
काळी ती चंद्रकळा धुवूधुवूनी नेसावी
आपल्या जन्माला असावी मायबाई ।
काळी ग चंद्रकळा धुवूधुवूनी झाला बोळा
रुपये दिले साडेसोळा बापाजींनी ।
काळी ग चंद्रकळा नको नेसू अंगणात
पति तुजा बंगल्यात भैनाबाई ।
काळी ग चंद्रकळा पदरी रामसीता
नेसली पतिव्रता मायबाई ।
काळी ग चंद्रकळा खडीनं भरली
संसारी रंगली वैनीबाई ।
भरील्या बाजारात काय किरान्या तुजी दाटी
बंदू हिंडतो बहिणीसाठी ।
लुगडं ग घेतीईलं त्याला रेशमी काडी काडी
नाही नेसत घाला घडी ।
मावबीळनी आत्या तुज्या माहेरी माझी सत्ता
तुजा बंदूजी माझा पिता ।
लुगडं घेतीईलं त्याला रेशमी नाही काही
माऊली ग बया बोल लेकी येवडयानं झालं नाही ।
लुगडं घेतीईलं त्याचा पदर दीडश्याचा
ताईता ग बंदूजीचा त्यांचा मैतर बडोद्याचा ।
सकाबीळच्या पारी वासुदेवाची आली फेरी
बया चांगुना दान करी ।
लुगबीडयाच्या आदी कसा पदर फाटला
पिताःमाज्याच्या जिवावरी नाही गुमान वाढला ।
बंदुजी पावना पडे उजेड वाडयावरी
हाती कंदील घोडयावरी ।
माह्यार माझं केलं एका बिग्याचा वसूल
सया बोलल्याल्या बंदू सम्रत असल ।