श्रीयज्ञसूकरस्तोत्रम्

रणरङ्गधीरकनकाक्ष - शमनकरयज्ञसूकरम् ।
चित्तसरसिभवे कलये वरदाभयाढ्यनिजपाणिपङ्कजम् ॥१॥
शरणागतार्त्तिहृतिरम्य - हृदयकमलं वराहकम् ।
नौमि सुरततिनम्यपदं प्रसभोद्धृताम्बुधिनिमग्नभूतनुम् ॥२॥
भवसिन्धुपारदनिजाङ्घ्रि - कमलजनुषं वराहकम् ।
संहृतदितितनुप्रभवं कलये नतार्थितसमस्तवस्तुदम् ॥३॥
नतिकृत्कृताघनिकुरम्ब - वनदवशुचिं वराहकम् ।
कम्पितभुवनघर्घरितं सततं भजामि विनताजवाहनम् ॥४॥