श्रीनारदभक्तिसूत्रें - सूत्र २९

भक्तिवांचोनि ज्ञान नाहीं । ऐसेंही बोलती कांही । तेही साचचि पाहीं । एकेपरी विचारतां ॥३००॥
तहानेवांचून जळ नाहीं । भुकेवांचूनि अन्न नाहीं । ऐसें कोणी म्हणतां कांही । अन्यथा म्हणों येईना ॥३०१॥
अंतरी असेल तळमळ । तरीच ज्ञान लाभेल सोज्वळ । एकावीण एक निष्फळ । ऐसें उघड जाहलें ॥३०२॥
या दोहींचा विचार पाहतां । अन्योन्य सापेक्षता । दिसों आली आम्हां तत्वतां । परि सिध्दांत तो वेगळाची ॥३०३॥