वीरभोजनविधि

नारायणबलीच्या पूर्वदिवशी अधिकारसिद्धि होण्याकरिता वीरभोजन करावे. ते वीर अकरा सांगितले आहेत - वीरभद्र, शंभु, गिरीश, अजैकपाद, अहिर्बुध्न्य, पिनाकी, भुवनाधीश्वर, कपाली, स्थाणु, भर्ग, रुद्र, याप्रमाणे हे वीर अकरा. यांच्या भोजनाकरितां अकरा, आठ अथवा चार ब्राह्मण बोलवावे. आचमन प्राणायाम करून देशकालाचा उच्चार करावा “ मम इह० ” असा संकल्प करून त्या ब्राह्मनांची वीरभद्रादि संतुष्ट होण्याकरिता षोडशोपचार पूजा करावी. नंतर नाना पक्वान्ने व अनारसे यांनी युक्त असे अन्न ब्रह्मणास घालून हात जोडून “ शिवोविष्णु० ” या मंत्रानें प्रार्थना करावी. भोजनानंतर तांबूल, वस्त्र, दक्षिणा वगैरेनी ब्राह्मणांस संतुष्ट करून आपल्या आज्ञेप्रमाणे नारायनबलि करतो असे बोलावे. त्या ब्राह्मणांनी कर अशी आज्ञा करावी.