अथ पूजाविधि:

त्रिसंध्यं प्रजपेन्मंत्रं पूजनं तत्समं भवेत्‌ । एकदा वा भवेत्पूजा न जपेत्पूजनं विना ॥
इति गोतमीयवचसा जपात्पूर्वं देवतापूजनं विहितं, पूजनं विना जपनिषेध उक्त:, अत एव पूजनविषये किंचिदुच्यते ।
उपासनायामिष्टदेवतापूजनं प्रधानमङ्गम्‌ ।
तेन हि देवता संतुष्यति, श्रद्धया कृतपूजनेन आत्मनि द्दढविश्वास आहलावदश्च समुत्पद्यत इति प्रत्यहं देवतापूजनं कर्तव्यमेव ।
तत्र आचारग्रंथेषु उपचारभेदाद्दशविधापूजाभेदा: समुपवर्णितास्ते च यथा - पूजैकेनोपचारेण द्वित्रिपंचभिरेव च ।
उपचारैश्च दशभिस्तथा षोडशभिश्च तै: ॥
द्वात्रिंशदुपचारैश्वाष्टचत्वारिंशता च तै: ।
चतु:षष्टया शक्त्यशक्यनुसारेण बहव: पक्षा उक्तास्ते च तत्र द्रष्टव्या: ।
अथ उपचारा नाम - उपचर्यते सेव्यते देवता यैस्ते उपचारा: ।
इष्टदेवताप्रीत्यर्थं पूजायामुपयुज्यमाना द्रव्यविशेषा: क्रियाविशेषा भावनाविशेषाश्चेति यावत्‌ ।
गंधपुष्पादय: द्रव्यविशेषा:, प्रदक्षिणानमस्कारादय: क्रियाविशेषा:, ध्यानावाहनादय:भावनाविशेषा:, मुख्यदेवतार्पणेनांगदेवतार्पणेन च तत्प्रीतिजननाश्चेति - चं. दी. ।
नैकविधेषु पूजाप्रकारेषु षोडशोपचारपूजाप्रकार एव प्राय: सर्वत्राद्रियत इति तदनुसारेणैव विचार: क्रियते ।