प्रातः स्मरणम् - श्रीदेवीप्रातः स्मरणम्

प्रातः स्मरामि शरदिन्दुकरोज्ज्वलाभां संरक्तवस्त्रकरकुण्डलहारभूषाम् । दिव्यायुधां जितसुनील सहस्त्रहस्तां रक्तोत्पलाभचरणां भवतापहन्त्रीम् १। प्रातर्नमामि महिषासुरचण्डमुण्डशुम्भासुरप्रमुखदैत्यविनाशदक्षाम् । ब्रह्मेन्द्ररुद्रमुनिमोहनशीललीलां चण्डीं समस्तसुरमूर्तिमनेकरुपाम् २। प्रातर्भजामि भजतामभिलाषदात्रीं धात्रीं समस्तजगतां दुरितापहन्त्रीम् । संसारबन्धनविमोचनहेतुभूतां मायां परां समधिगम्य परस्य विष्णोः ३। श्लोकत्रयमिदं देव्याश्चण्डिकायाः पठेन्नरः । सर्वान्कामानवाप्नोति विष्णुलोके महीयते ४। इति देवीप्रातः स्मरणम् ॥