स्त्रीगीत - नव्या सुनेचे स्वागत

आज सोनियाचा क्षण । दारी लाविले तोरण
गृहस्वामिनी घरासी । आज येणार म्हणून ॥१॥
घरदार हे सजले । सज्ज सारे स्वागताला
ये ग निर्मल मनाने । आपुल्याच सदनाला ॥२॥
सुख सौभाग्य वैभव । येइ सौजन्या मागून
सौजन्याचा थोर वसा । ठेव मनी जोपासून ॥३॥
आधी देता थोडे फार । देव देतसे अपार
यांजसाठी संस्कारांचा । थोर करिती आदर ॥४॥
तुज संस्कारांची ठेव । दिली माय पितयाने
नांद आपुल्या गृहांत । गात आनंदाचे गाणे ॥५॥
आशिर्वादाच्या अक्षता । जणुं शब्द सदिच्छेचे
ऐशा मंगल समयी । अभिष्ट मी चिंतायाचे ॥६॥