आम्ही कोण ?

( शार्दूलविक्रीडित )

आम्ही कोण म्हणुनि काय पुससी ?--- आम्ही असूं लाडके ---

देवाचे, दिधलें असे जग तयें आम्हांस खेळावया;
विश्वीं या प्रतिभाबलें विचरतों चोहींकडे लीलया

दिक्कालांतुनि आरपार अमुची दृष्टी पहाया शके !
सारेही बडिवार येथिल पहा ! आम्हांपुढें ते फिके;

पाणिस्पर्शच आमुचा शकतसे वस्तूप्रती द्यावया ---
सौन्दर्यातिशया, अशी वसतसे जादू करांमाजि या;

फोलें पाखडितां तुम्ही निवडितों तें सत्त्व आम्ही निकें !
शून्यामाजि वसाहती बसविल्या कोणीं सुरांच्या बरें ?

पृथ्वीला सुरलोकसाम्य झटती आणावया कोण ते ?
ते आम्हीच सुधा कृतींमधुनिया ज्यांच्या सदा पाझरे ?

ते आम्हीच शरण्य मंगल तुम्हां ज्यांपासुनी लाभतें !
आम्हांला वगळा---गतप्रभ झणीं होतील तारांगणें;

आम्हांला वगळा---विकेल कवडीमोलापरी हें जिणें !

फैजपूर २९ नोव्हेंबर १९०१