उत्तरभागः - अध्यायः ४४

सनत्कुमार उवाच ॥
अथान्यत्संप्रवक्ष्यामि सर्वदानोत्तमोत्तमम् ॥
पूर्वोक्तदेशकाले च मंडपे च विधानतः ॥१॥

प्रणयात्कुंडमध्ये च स्थंडिले शिवसन्निधौ ॥
पूर्वं विष्णुं समासाद्य पद्मयोनिमतः परम् ॥२॥

मंत्राभ्यां विधिनोक्ताभ्यां प्रणवादिसमंत्रकम् ॥
नारायणाय विद्महे वासुदेवाय धीमहि ॥
तन्नो विष्णुः प्रचोदयात् ॥३॥

ब्रह्मब्राह्मणवृद्धाय ब्रह्मणे विश्ववेधसे ॥
शिवाय हरये स्वाहा स्वधा वौषट्वषट् तथा ॥४॥

पूजयित्वा विधानेन पश्चाद्धोमं समाचरेत् ॥
सर्वद्रव्यं हि होतव्यं द्वाभ्यां कुंडविधानतः ॥५॥

ऋत्विजौ द्वौ प्रकर्तव्यौ गुरुणा वेदपारगौ ॥
तानुद्दिश्य यथान्यायं विप्रेभ्यो दापयेद्धनम् ॥६॥

शतमष्टोत्तरं तेभ्यः पृथक्पृथगनुत्तमम् ॥
वस्त्राभरणसंयुक्तं सर्वालंकारसंयुतम् ॥७॥

गुरुरेको हि वै श्रीमान् ब्रह्मा विष्णुर्महेश्वरः ॥
तेषां पृथक्पृथग्देयं भोजयेद्ब्राह्मणानपि ॥८॥

शिवार्चना च कर्तव्या स्नपनादि यथाक्रमम् ॥९॥

इति श्रीलिंगमहापुराणे उत्तरभागे चतुश्चत्वारिंशोऽध्यायः ॥४४॥