बृहत्पाराशरहोराशास्त्रम् - अध्याय ६९

एवं शोध्यावशेषाङ्कं राशिमानेन वर्द्धयेत् ।
ग्रहयुक्ते च तद्राशौ ग्रहमानेन वर्द्धयेत् ॥१॥
सर्वेषां च पुनर्योगः पिण्डाख्यः कथ्यते द्विज ।
गोसिंहौ दशभिर्गुण्यौ वसुभिर्युग्मवृश्चिकौ ॥२॥
सप्तभिस्तुलमेषौ च मृगकन्ये च पञ्चभिः ।
शेषाः स्वसंख्यया गुण्या ग्रहमानमथोच्यते ॥३॥
जीवारशुक्रसौम्यानां दशाष्टनगसायकाः ।
पञ्च शेषग्रहाणां च मानं प्रोक्तमिदं क्रमात् ॥४॥