गोपीजनाय कथितं नियमावसाने
मारोत्सवं त्वमथ साधयितुं प्रवृत्तः ।
सान्द्रेण चान्द्रमहसा शिशिरीकृताशे
प्रापूरयो मुरलिकां यमुनावनान्ते ॥१॥
सम्म्र्च्छनाभिरुदितस्वरमण्डलाभिः
सम्मूर्च्छयन्तमाखिलं भुवनान्तरालम् ।
त्वेद्वेणुनादमुपकर्ण्य विभो तरुण्य -
स्तत्तादृशं कमपि चित्तविमोहमापुः ॥२॥
ता गोहकृत्यनिरतास्तनयप्रसक्ताः
कान्तोपसेवनपराश्र्च सरोरुहाक्ष्यः ।
सर्वं विसृज्य मुरलीरवमोहितास्ते कान्तारदेशमयि कान्ततनो समेताः ॥३॥
काश्र्चिन्निजाङ्गपरिभूषणमादधाना
वेणुप्रणादमुपकर्ण्य कृतार्धभूषाः ।
त्वामागता ननु तथैव विभूषिताभ्य -
स्ता एव संरुरुचिरे तव लोचनाय ॥४॥
हारं नितम्बभुवि काचन धारयन्ती
काञ्चीं च कण्ठभुवि देव समागता त्वाम् ।
हारित्वमात्मजघनस्य मुकुन्द तुभ्यं
व्यक्तं बभाष इव मुग्धमुखी विशेषात् ॥५॥
काचित् कुचे पुनरसज्जितकञ्चुलीका
व्यामोहतः परवधूभिरलक्ष्यमाणा ।
त्वामाययौ निरुपमप्रणयातिभार -
राज्याभिषेकविधये कलशीधरेव ॥६॥
काश्र्चिद् गृहात् किल निरेतुमपारयन्त्य -
स्त्वामेव देव हृदये सुदृढं विभाव्य ।
देहं विधूय पराचित्सुखरूपमेकं
त्वामाविशन् परमिमा ननु धन्यधन्याः ॥७॥
जारात्मना न परमात्मतया स्मरन्त्यो
नार्यो गताः परमहंसगति क्षणेन ।
तं त्वां प्रकाशपरमात्मतनुं कथञ्चि -
च्चित्ते वहन्नमृतमश्रममश़ृवीय ॥८॥
अभ्यागताभिरभितो व्रजसुन्दरीभि -
र्मुग्धस्मितार्द्रवदनः करुणावलोकी ।
निस्सीमकान्तिजलधिस्त्वमवेक्ष्यमाणो
विश्र्वैकहृद्य हर मे पवनेश रोगान् ॥९॥
॥ इति रासक्रीडायां गोपीसमागमवर्णनं पञ्चषष्टितमदशकं समाप्तम् ॥