सहस्त्रदळीचे शेवटी । पैल तुर्येचे पाठी ।
चिन्मय मोती दिठी । दिसताहे ॥२३॥
टीकाः
औटपीठपैल पाठी । आत्माचि भरे केवल दृष्टी । साक्षात्कार हा संपुटी । नयनाचिये ॥१॥
समत्वची जाली पुष्टी । जरि कां रामकृष्णीया दिठी । तरी सहस्त्रदळीं शेवटी । चिन्मय मोती दिसताहे ॥२॥
चिन्मय जे मुक्त स्थिती । तेचि बोलिले चिन्मयमोती । चिन्द्रुप ते पहातां गति । शुन्याआतु ॥३॥
शुन्याआतु रामकृष्ण । तेचि चिद्रुप सगुण । तयापैल ते निर्गुण । सहस्त्रदळीं ॥४॥
सहस्रदळीया सद्रुप । चिन्मय जे निर्विकल्प । सतं बोलिले मुक्तरुप उघडपणें ॥५॥
परिपुर्ण स्वतः सिद्ध । नित्यत्वेकं शुद्ध बुद्ध । पहातं तेजाळ अगाध । निरुपाधिक ॥६॥
साक्षात्कार इये दिठी । पहातांचि पडे मिठी । दाटे आल्हाद दृष्टीपुटीं । एकसर ॥७॥
ऐसे ज्ञानराजा जालें प्रेम । प्रेमासी मिळालें । अंतरीचें अंतरीं फावलें । गुरुचे गुज ॥८॥