पद १ ले प्रभाती
उठा सद्गुरुराजसमर्था उघडा ज्ञानलोचन ॥
बोध - भानु हा उदय जाहला पसरी आद्वय - किरणां ॥धृ०॥
रम्य उशा ही द्वारि पातली करी तव स्वरुपी वंदना ॥
पंच स्वर हे पक्षी गाती आळविती तव कृपाधना ॥१॥
फुलली कमळे सरोवरी ही भृंग गुंतले रसपाना ॥
चक्रवाक हे एक जळी दुजेपणाते सारुन ॥२॥
मुक्तमाळ ही शीत जाहली तव स्वरुपाच्या स्पर्शाने ॥
दृष्टतांबुल विटोनी गेला टाकीला निसारपणे ॥३॥
त्रिगुण काकडा पंच आरती घेऊनि तिष्ठति भक्तजना ॥
कृपा करुनिया दर्शन द्यावे भागिरथी करि पदिं वंदना ॥४॥
पद २ रे काकड आरती
चाल - मायाविद्या
प्रातःकाळ होतां काकड आरती ओवाळूं ,
अन्यन्यभावे लीन होउनी चरणांवरि लोळूं ॥धृ०॥
जीवदशा अज्ञानाचा काकडा केला ,
ओंवाळितां तल्लिन झाले पाहतां मुखकमळा ॥१॥
जिकडे पाहे तिकडे एकच सद्गुरु भरला ,
अवघा घनानंद माझा मीच पाहिला ॥२॥
पाहतां पाहतां एकचि झाला नाही दुजेपण ,
सद्गुरुनाथें कृपा करोनी दाखविली खूण ॥३॥
बलभीमराये दया करोनी धरिले करकमळां ,
दास भागिरथी प्रेमे दिधलासे थारा ॥४॥
पद ३ रे काकडा झाला
काकडा झाला आतां कोजळी काढा ॥धृ०॥
ज्ञानगंगा आणोनिया , भावे झारी भरोनिया ,
चौ - देहाचा चवरंग करोनी , त्यावरी बसवा सद्गुरुला ,
प्रभुचे मुख प्रक्षाळा ॥१॥
नामरुपाची करुनी राखुंडी , एक बोटाने दंतमंजन करा ,
करुनि शुद्ध तिथें भाव भक्ति - रुमालाने पुसा ,
दास्यत्वासी तनु ही लावा ॥२॥
मनबुद्धीचे पाटचि मांडा , अष्टभावांचे आसन घाला ,
चित्तवाटि नवनीताने भरुनिया ठेवा , अष्ट आंग बल -
भीमचरणी लावा , भागिरथी म्हणे आतां प्रेमे न्याहाळा ॥३॥
पद ४ थे दूध
दूध घेइं सद्गुरुराया , लागतसे दासी पाया ॥धृ०॥
वासना शेगडी करोनी , षडरिपु - कोळसे घालुनी ,
प्रेम वरी दूध तापउनि , अर्पितसे तंव चरणा या ॥१॥
शांतीची बशी करोनी , साद्विचार - भांडे भरोनी ,
विवेकाचा चमचा करोनी , लावितसे मुखकमळा या ॥२॥
घालुनी निवृत्ती - शरकरा , शुद्ध सत्त्वाचा वेलदोडा ,
ध्यानी बसवी सगुण सुंदरा , तृप्त करी या इच्छेला ॥३॥
नाथ बलभीमराज समर्थ , पूर्ण करी मनोरथ ,
दावीत सर्वांचा अर्थ , सुखी केले भागिरथीला ॥४॥
पद ५ वे जेवण
तूं रे भोजन करी माझ्या भावा , भक्ति विनवीतसे देवा ॥धृ०॥
शुद्ध सत्ताचा भात केला , र्हस्व मीचे मेतकुट वाढिले ,
दीर्घ मीचा घांस घ्यावा ॥१॥
बोधप्रबोधांचे घुसळण केले , ज्ञान नवनीत वरती आले ,
गुरुवचनांनी कढविले ॥२॥
ठकू हे भांडे अधिकारी केले , निजबोधाने गाळीयेले ,
मीठची होउनी तोंडी लावा ॥३॥
बलभीमराये कुरवाळिले , भागिरथीसी जेवविले ,
एकानंदे होउनि ठेविले ॥४॥
पद ६ वे मुखप्रक्षालन
श्रीसद्गुरुचे मुख प्रक्षाळूं , ज्ञान उदक हे घेऊं ॥धृ०॥
भावभक्तिचा तांब्या करुनी , ज्ञान - गंगा जल ठेवूं ॥१॥
शुद्ध सत्त्वाचा रुमाल घेउनि , वरदहस्त की देऊं ॥२॥
बलभीमराय समर्थ या जगिं , ठकू म्हणे चरणी राहूं ॥३॥
पद ७ वे विडा
घ्या विडा सद्गुरुराया ॥धृ०॥
वासनेचे पान घेउनि , मीपण लावूनि चुना ॥१॥
अविद्येचा कात घालुनि , फोडिं विकल्प - सुपारीला ॥२॥
जाणे - येणे जायपत्रि घालुनी , लवण लवंगहि पानाला ॥३॥
बलभीमराज समर्थ या जगिं , ठकूस दावि निजरंगाला ॥४॥
पद ८ वे
चाल - चक्षु दरपणी
मौज गुरुसदनी अहाहा ॥ गुरुभक्तांसी दिसे लोचनी अहाहा ॥धृ०॥
किती दयाळू गुरुमाउली हो । खटनटासि घे पदरी हो ॥
बोध करुनी सर्वांसी सोडी अहाहा ॥१॥
कसे नाथाने नवल केले हो । दोष दृष्टिरुप सर्व दाविले हो ।
मज स्वयंसच्चिदानंद केले अहाहा ॥२॥
बलभीमराज ज्ञान - मुळी हो । भागिरथी अमरवेली हो ॥
चिदाकाशी पसरली अहाहा ॥३॥
पद ९ वे नमस्कार
कसे हंसराये आपणचि केले ।
स्वयंप्रकाश होऊनि पाहे ।
माया तनु ही घेऊनि कैसी ।
नमस्कार करितों आपाआपणांसी ॥१॥
तया हंसादेवास ब्रम्ही नमिले ।
वरिष्ठासि मानोनि पुढेचि ठेले ।
तया बोध देवोनि संतोषवीला ।
नमस्कार माझा तया हंसदेवा ! ॥२॥
भवभ्रांति सर्व हरायास माझी ।
करी चरणसेवा प्रेमेसि तूझी ।
भावेसि अत्री अखंड पद पहाया ।
नमस्कार करितो हो ब्रह्मदेवा ! ॥३॥
प्रबोधाची शक्ति असे बहुत युक्ति ।
कशी दाविली त्वांहि जगोत्पत्ती ।
म्हणुनी शरण दत्त जयाला ।
नमस्कार अत्रिदेवासि केला ॥४॥
निजबोधसरणी तुझी कोण वाणी ।
नेऊनि करसी निरंजनी मिळणी ।
नारायण गिरनारी भेटे गुरुला ।
नमस्कार करितो दत्तदेवा दयाळा ॥५॥
वैराग्य कैसे अंतरंगी झळाळी ।
प्रपंचात राहूनि परमार्थ पाळी ।
लक्ष्मण सेवी गुरुवचनाला ।
नमस्कार नारायण सद्गुरुला ॥६॥
परमात्मप्राप्तीचि आस्थाहि भारी ।
देव दावि ऐसा कधिं भेटे कैवारी ।
त्या बलभिमासी स्वयंदेव केला ।
नमस्कार त्या लक्ष्मण देवदेवा ! ॥७॥
जपतप अनुष्ठान बहुत केले ।
पुढे संत साधूसि मी कोण पुसिले ।
मी दाउनी ठकुसी परब्रह्म केले ।
बलभीमचरणी नमुनि ऐक्यत्व झाले ॥८॥
पद १० वे
प्रीति जडो तव पदिं गुरुराया ।
भजन घडो इंद्रिय - समुदाया ॥धृ०॥
रसना रंगो गुणगानरसी ।
यथार्थसार ज्ञान व्हावया ॥१॥
करणद्वय मम पवित्र होवो ।
झटुनि विमल विभुयश ऐकाया ॥२॥
नयन प्रेमे असोत उत्सुक ।
रम्य जगी तव दर्शन घ्याया ॥३॥
भक्तिद्वय हे भान विसरुनी ।
लागो द्वय चरण नाचाया ॥४॥
वाद्यांच्या गजरे कर टाळी ।
सिद्ध होत मम तुजसि वाहाया ॥५॥
नाम असे ज्या उत्तम अंग ते ।
नित्य लवो शिर तुजसि नमाया ॥६॥
दास भागिर्थी लीन सदाही ।
प्रार्थितसे बलभिमचरणा या ॥७॥